လူမျိုးပေါင်းစုံအထွေထွေသပိတ်ကော်မတီ (General Strike Committee of Nationalities – GSCN) ကို ၂၀၂၁ ခုနှစ်၊ ဖေဖော်ဝါရီလ ၁၁ ရက်နေ့တွင် GSCN ၏ အခြေခံမူ၊ ကြွေးကြော်သံနှင့် နိုင်ငံရေး ရည်မှန်းချက်တို့ကို လက်ခံယုံကြည်သော လူမျိုးစုများက တစ်ဦးချင်းဖြစ်စေ၊ လူမျိုးစု အစုအဖွဲ့ကို ကိုယ်စားပြု၍ ဖြစ်စေ ပါဝင်ကာ စတင်ဖွဲ့စည်းခဲ့သည်။ အာဏာရှင်စနစ် အမြစ်ဖြတ်ရေး၊ ၂၀၀၈ ဖွဲ့စည်းပုံ အခြေခံဥပဒေ ဖျက်သိမ်းရေး၊ မတရားဖမ်းဆီး ခံရသူများ လွတ်မြောက်ရေး စသည့် ကြွေးကြော်ချက်များနှင့် အတူ ဖက်ဒရယ် ဒီမိုကရေစီ ပြည်ထောင်စု ပေါ်ပေါက်ရေး အတွက် နည်းလမ်းမျိုးစုံဖြင့် တစိုက်မတ်မတ် တိုက်ပွဲ ဝင်ခဲ့သည်။

GSCN သည် နိုင်ငံရေး ကဏ္ဍတွင် နိုင်ငံရေး အဖွဲ့အစည်းများနှင့် ညှိနှိုင်းဆောင်ရွက်ခြင်း၊ သပိတ်ကဏ္ဍတွင် အခြား သပိတ်ကော်မတီများနှင့် ပူးပေါင်း၍ နည်းလမ်းမျိုးစုံ ပုံသဏ္ဍာန်မျိုးစုံ အသုံးပြုကာ အကြမ်းမဖက်သည့် သပိတ်မှောက်သည့် လုပ်ငန်းစဉ်များကို လုပ်ဆောင်ခဲ့သည်။

အခြေခံမူများမှာ (၁) ဖက်ဒရယ် ဒီမိုကရေစီ ပြည်ထောင်စု ပေါ်ပေါက်ရေး၊ (၂) စုပေါင်းခေါင်းဆောင်မှု ကျင့်သုံးခြင်း၊ (၃) တန်းတူညီမျှခြင်းနှင့် တရားမျှတခြင်း၊ (၄) အပြန်အလှန် လေးစားတန်ဖိုးထားခြင်းနှင့် (၅) ကိုယ်ပိုင်ပြဌာန်းခွင့် ရရှိခြင်းတို့ ဖြစ်သည်။

GSCN ၏ နိုင်ငံရေး ရည်မှန်းချက် (၄) ချက်မှာ အာဏာရှင်စနစ် အမြစ်ဖြတ်ရေး၊ ဖက်ဒရယ် ဖွဲ့စည်းပုံ အခြေခံ ဥပဒေတစ်ရပ် ပေါ်ပေါက်ရေး၊ ဖက်ဒရယ် ဒီမိုကရေစီ နိုင်ငံသစ် ပေါ်ထွန်းရေး နှင့် ဖိနှိပ်ခံ လူထု တစ်ရပ်လုံး လွတ်မြောက်ရေး တို့ပင်ဖြစ်သည်။

၂၀၂၁ ခုနှစ်မှ စ၍ ချီတက်သပိတ်၊ ခံစစ်သပိတ်၊ ပြောက်ကျားသပိတ်၊ အွန်လိုင်း ကမ်းပိန်းများကို လုပ်ဆောင်ခဲ့သည်။ ၂၀၂၂ ခုနှစ်မှ ယနေ့အထိ စိုးမိုးနယ်မြေများတွင် မြေပြင်သပိတ်များ ပူးပေါင်း ဖော်ဆောင်ခြင်း၊ သွေးစွန်းငွေ ဖြတ်တောက်ရေး လှုပ်ရှားမှု၊ စစ်ကောင်စီဩ တရားမဝင် ရွေးကောက်ပွဲ ဆန့်ကျင်ရေး လှုပ်ရှားမှုများ နှင့် အွန်လိုင်းကမ်ပိန်း၊ ချီတက်သပိတ်နှင့် မီဒီယာမှ တဆင့် လှုပ်ရှားမှုတို့ ဖြင့် လုပ်ဆောင်နေသည်။

GSCN တွင်ပါဝင်သည့် ရဲဘော်ရဲဘက်များနှင့် လူငယ်မီဒီယာသမားများ မှ GSCN အခြေခံမူနှင့် နိုင်ငံရေးရည်မှန်းချက်များကို ကိုင်စွဲလျက် ဖက်ဒရယ် FM ကို တည်ထောင်ခဲ့ပြီး လက်ရှိတွင် ဖက်ဒရယ် FM သည် သီးခြားလွတ်လပ်သည့် မီဒီယာတစ်ခုအဖြစ် ရပ်တည်လျက်ရှိသည်။

GSCN သည် အမျိုးသားညီညွတ်ရေး အတိုင်ပင်ခံကောင်စီ (National Unity Consultative Council) တွင် အဖွဲ့ဝင်အဖွဲ့အစည်းအဖြစ် ပါဝင်သည်။