၂၀၂၁ ခုနှစ်၊ စက်တင်ဘာလ (၆)ရက်နေ့တွင် စစ်အာဏာရှင်စနစ်အား အမြစ်ဖြတ်တိုက်ထုတ်၍ အမျိုးသမီးများ၏ ဦးဆောင်ပါဝင်မှုနှင့်အတူအနာဂတ် ဖက်ဒရယ် ဒီမိုကရေစီ နိုင်ငံတော်သစ် တစ်ရပ် ဖြစ်ထွန်းလာစေရန် ရည်ရွယ်လျက် မြေပြင်သပိတ်အင်အားစုအသီးသီးတွင် ပါဝင်လှုပ်ရှားနေကြသော လူငယ်အမျိုးသမီးများဖြင့် အမျိုးသမီး မဟာမိတ် အင်အားစု(Women Alliance Burma – WAB) ကို ဖွဲ့စည်းခဲ့သည်။ တော်လှန်ရေးကာလ၊ ကြားကာလနှင့် ပြန်လည်ထူထောင်ရေးကာလမျိုးတွင် အမျိုးသမီးပိုမိုအားကောင်စွာ ပါဝင်ဦးဆောင် လှုပ်ရှားနိုင်ရန် ရည်ရွယ်၍ WAB ကို ဖွဲ့စည်းခဲ့သည်။

WAB ၏ ရည်မှန်းချက်ပန်းတိုင်များမှာ

(၁) မြေပြင် အမျိုးသမီး သပိတ်များအားကောင်းလာစေရန်နှင့် အခြားသောတော်လှန်ရေး ကဏ္ဍ အသီးသီးကို အရှိန်အဟုန်မြှင့်လုပ်ဆောင်ရေး၊

(၂) စစ်မှန်သော ဖက်ဒရယ် ဒီမိုကရေစီနိုင်ငံတော်သစ်တစ်ရပ် ပေါ်ပေါက်လာရေး၊

(၃) အနာဂတ် ဖက်ဒရယ်နိုင်ငံတည်ဆောက်ရေးလုပ်ငန်းစဉ်များတွင် အမျိုးသမီးများ၏ ဦးဆောင်ပါဝင်မှု ကဏ္ဍ တိုးမြင့်လာစေရေးတို့ပင်ဖြစ်သည်။

WAB တွင် ပါဝင်သော အမျိုးသမီးသပိတ်အင်အားစုများမှာမန္တလေးအမျိုးသမီး သပိတ်စစ်ကြောင်း၊ ရန်ကုန် အမျိုးသမီး သပိတ်စစ်ကြောင်း၊ မုရွာပင်မအမျိုးသမီး သပိတ်စစ်ကြောင်း၊ မုံရွာ-အမြင့်လမ်းဘေး ကျေးရွာများ အမျိုးသမီး သပိတ်စစ်ကြောင်း၊ချင်းတွင်းမြစ် အနောက်ဘက်ကျေးရွာပေါင်းစုံ အမျိုးသမီး သပိတ်အင်အားစု၊ ကလေးမြို့ အမျိုးသမီးသပိတ်စစ်ကြောင်း၊ ဒီပဲယင်းမြို့နယ် အမျိုးသမီး သပိတ်စစ်ကြောင်း၊ တန့်ဆည်မြို့နယ် အမျိုးသမီးသပိတ်စစ်ကြောင်း၊ ထားဝယ် အရှေ့တော အမျိုးသမီး သပိတ်စစ်ကြောင်း၊ဂန့်ဂေါမြို့နယ် အမျိုးသမီးသပိတ်စစ်ကြောင်း နှင့် ယင်းမာပင်မြို့နယ် အမျိုးသမီး သပိတ်စစ်ကြောင်းတို့ပင် ဖြစ်သည်။

WAB သည် ၂၀၂၃ ခုနှစ်တွင် စစ်တပ်ထုတ်ကုန်မဝယ်ရေး၊ဘူးသပိတ်လှုပ်ရှားမှု၊ တော်လှန်ရုပ်ရှင်ပြပွဲနှင့် လူထုဟောပြောပွဲ၊ အမျိုးသမီးများအတွက်လိုအပ်သည့်ပစ္စည်းများ လှူဒါန်းပေးမှုများ၊ သပိတ်လှုပ်ရှားမှု၊  နိုင်ငံရေး အကျဉ်းသားလွတ်မြောက်ရေး Blue ShirtCampaign၊ တော်လှန်သင်္ကြန်လှုပ်ရှားမှု၊ ဖက်ဆစ်ရွေးကောက်ပွဲ တိုက်ဖျက်ရေး လှုပ်ရှားမှု၊စသည့် လှုပ်ရှားမှုများကို လုပ်ဆောင်ခဲ့ကြသည်။ ၂၀၂၁ ခုနှစ်နှင့် ၂၀၂၂ ခုနှစ်တွင် ဒေသအလိုက်အမျိုးသမီးအရေးနဲ့ အာဏာရှင်စနစ်ဆန့်ကျင်ရေး သပိတ်တွေ၊ လှုပ်ရှားမှုတွေကိုအင်အားကောင်းစွာ ပြုလုပ်နိုင်ခဲ့ပါတယ်။

ယခုအခါတွင် WAB သည် ၂၀၂၃ ခုနှစ်၊အောက်တိုဘာလ (၂၉) ရက်နေ့တွင် ရက် (၁၀၀၀) ပြည့်မည့် နွေဦးတော်လှန်ရေးနှင့် ပတ်သက်၍“တော်လှန် အလင်းဆောင် ရက်တစ်ထောင်၊ မျှဝေကူညီ ပြည်သူ့အောင်ပွဲဆီ” လှုပ်ရှားမှုကို စတင်ဆောင်ရွက်နေပါသည်။

WAB သည် အာဏာရှင်စနစ်နှင့်အတူအမျိုးသမီးများအပေါ် မတရားဖိနှိပ်မှုများနှင့် ရှေးရိုးစွဲ အတွေးအခေါ်များကို စိန်ခေါ်တိုက်ထုတ်နေသည့်မြေပြင်သပိတ်များနှင့် အမျိုးသမီးရေးရာ လှုပ်ရှားမှုများ သာမက အမျိုးသမီးများ စွမ်းဆောင်ရည်မြင့်တက်လာစေရန်နှင့် ကဏ္ဍအသီးသီးတွင် အမျိုးသမီးများ၏ ဦးဆောင်ပါဝင်မှု တိုးမြင့်လာစေရန်အတွက်အသိပညာပေး ဟောပြောပွဲများ၊ ဆွေးနွေးပွဲများ ကျင်းပပေးခဲ့ပြီး အမျိုးသမီးများအတွက် အရေးပေါ်လိုအပ်သည်များကိုလည်းထောက်ပံ့ပေးနိုင်ခဲ့သည်။