စစ်အုပ်စုက ၂၀၂၁ ခုနှစ် ဖေဖော်ဝါရီ ၁ ရက် အာဏာသိမ်းပြီးနောက် နိုင်ငံတွင် ဖြစ်ပွားနေသည့် အခြေအနေများကို စုစည်း၍ "မြန်မာနိုင်ငံအခြေအနေနှင့် စပ်လျဉ်းသည့် ထုတ်ပြန်ကြေညာချက်" အမည်ဖြင့် အမျိုးသားညီညွတ်ရေးအစိုးရ (NUG) က စက်တင်ဘာ ၂၀ ရက်တွင် ထုတ်ပြန်လိုက်သည်။
ထုတ်ပြန်ချက်၌ စစ်အုပ်စုက အရပ်သားများအား ပစ်မှတ်ထား၍ လေကြောင်းတိုက်ခိုက်မှု ပြုလုပ်မှု၊ အခြေခံအဆောက်အဦများ ပျက်စီးရမှု၊ ဒီမိုကရေစီလှုပ်ရှားသူများအား ဖမ်းဆီး/သတ်ဖြတ်မှု အပါအဝင် နိုင်ငံတကာက မြန်မာနှင့် သတ်မှတ်ပြီး ချမှတ်ထားသည့် ဘုံသဘောတူညီချက်များအား မလိုက်နာဘဲ ချိုးဖောက်မှုအခြေအနေများအား စုစည်းဖော်ပြထားသည်။ ထို့ပြင် စစ်အုပ်စုအား လက်နက်ကိုင်တော်လှန်ရန် ဖွဲ့စည်းထားသည့် ပြည်သူ့ကာကွယ်ရေးတပ်မတော် - PDFနှင့် ပတ်သက်သည့် အချက်အလက်များကိုလည်း အချက် ခြောက်ချက်ထည့်သွင်းဖော်ပြထားသည်။