ထားဝယ်ခရိုင် ဒီမိုကရေစီအရေးလှုပ်ရှားမှု သပိတ်ကော်မတီ (Democracy Movement Strike Committee-Dawei - DDMSC) ကို၂၀၂၁ စစ်အာဏာသိမ်းမှုအပေါ် အစောဆုံးဆန့်ကျင်ခဲ့ကြသည့်ထားဝယ်လူငယ်တစ်စုမှ ၂၀၂၁ ခုနှစ်၊ ဖေဖော်ဝါရီလ ၇ ရက်နေ့ညတွင် စတင်ဖွဲ့စည်းထူထောင်ခဲ့ပြီး ဆန့်ကျင်သပိတ်မှောက်ခြင်းနှင့်စည်းရုံးသိမ်းသွင်းခြင်း (Protest and Persuaion)၊ မပူးပေါင်းဆောင်ရွက်ခြင်း (Non-cooperation)၊ ဝင်ရောက်စွက်ဖက်ခြင်း (Intervention) စသည့် အကြမ်းမဖက်တိုက်ပွဲနည်းနာများကို ကိုင်စွဲ၍ ထားဝယ်ခရိုင် ဒီမိုကရေစီအရေးလှုပ်ရှားမှု လူထုအရေးတော်ပုံကြီးကိုဦးဆောင်ခဲ့သည်။

DDMSCတွင် ဗဟိုကော်မတီ၊စည်းရုံးလှုံ့ဆော်ရေးဆပ်ကော်မတီ၊ လူမှုကူညီရေးဆပ်ကော်မတီ၊သတင်းပြန်ကြားရေးဆပ်ကော်မတီ၊ နိုင်ငံခြားဆက်ဆံရေးဆပ်ကော်မတီ၊ ဘဏ္ဍာရေး ဆပ်ကော်မတီ များဖွဲ့စည်းထားသည်။

DDMS ၏ ရေရှည် မျှော်မှန်းချက်မှာ  ဒီမိုကရေစီအရေး၊  စစ်အာဏာရှင်စနစ် ချုပ်ငြိမ်းရေး၊ ဖွဲ့စည်းပုံအခြေခံဥပဒေ(၂၀၀၈) ဖျက်သိမ်းရေး၊ ဖက်ဒရယ်အရေး၊ လွတ်လပ်မှု (Liberty)၊ တရားမျှတမှု (Justice)၊ တန်းတူညီမျှမှု( Equality)နှင့် သွေးစည်းညီညွတ်မှု (Solidarity) ရှိသောလူ့ဘောင်ကို တည်ဆောက်ရေး၊ နှင့်  ပြည်တွင်းငြိမ်းချမ်းရေး တို့ပင် ဖြစ်သည်။ DDMSC ၏ လုပ်ငန်းစဉ်များမှာ ထားဝယ်ခရိုင်အကြမ်းမဖက်လူထုလှုပ်ရှားမှုတိုက်ပွဲကို ဦးဆောင်ရန်၊ လူထုအာဏာဖီဆန်ရေး လှုပ်ရှားမှုကိုဖော်ဆောင်ရန်၊ စစ်တပ် ၊ စစ်အုပ်စုနှင့် ပက်သက် ဆက်နွယ်သည့်ရင်းနှီးမြှုပ်နှံမှုများနှင့် စီးပွားရေးလုပ်ငန်းများအား သပိတ်မှောက်ဆန့်ကျင်ရန်၊နှင့် အဖမ်းဆီးခံ နိုင်ငံရေးအကျဉ်းသားများ ၊ CDM ဝန်ထမ်းများနှင့် စစ်ဘေးရှောင်ပြည်သူများအားကူညီ ထောက်ပံ့ရန်တို့ပင် ဖြစ်သည်။ ၎င်းတို့၏ ရည်တည်ချက်များမှာ

-      အပြည်ပြည်ဆိုင်ရာ လူ့အခွင့်အရေးကြေညာစာတမ်းပါ ပြဌာန်းချက်များအားလေးစား လိုက်နာ သည်။

-      နိုင်ငံရေးပြဿနာကိုနိုင်ငံရေးနည်းလမ်းဖြင့် တွေ့ဆုံဆွေးနွေးအဖြေရှာခြင်းအား လက်ခံ သည်။(ပါဝင်သင့်/ပါဝင်ထိုက်သူများအားလုံး ပါဝင်နိုင်သော တွေ့ဆုံဆွေးနွေးမှုမှတဆင့်တိုင်းရင်းသားပြည်သူ လူထုတစ်ရပ်လုံး၏ လိုလားချက်နှင့် ကိုက်ညီသည့် နိုင်ငံရေးရလာဒ်ထွက်ပေါ်လာရေးကို ဦးတည်သည်။)

-      ပြည်သူလူထု၏တရားသော ခုခံတော်လှန်စစ်ကို ထောက်ခံသည်။

-      အရပ်သားပြည်သူများအပေါ်စစ်ရေးအရ ပစ်မှတ်ထားတိုက်ခိုက်ခြင်းများကို ဆန့်ကျင်သည်။ (အသားအရောင် ၊ လူမျိုး ၊ဘာသာ ၊ လိင်/လိင်စိတ်ခံယူမှုနှင့် နိုင်ငံရေး ယုံကြည်ချက် ကွဲပြားမှုများကြောင့်စစ်ရေးအရ ပစ်မှတ်ထားတိုက်ခိုက်ခြင်းများအား ဆန့်ကျင်သည်။)

-      အာဏာသိမ်းစစ်ကောင်စီမှတဖက်သတ်ကျင်းပရန် ကြေညာထားသည့် (၂၀၂၃) အထွေထွေ ရွေးကောက်ပွဲ အားလုံးဝဆန့်ကျင်ကန့်ကွက်သည်။

-      ဝေဖန်ထောက်ပြမှုကိုခွင့်ပြုသည်းခံ၍ မတူကွဲပြားမှုကို လက်ခံအားပေးသည်။

DDMSC တွင် ထားဝယ်ပင်မသပိတ်စစ်ကြောင်း၊ ပညာ/အင်ယာ စစ်ကြောင်း၊ LGBT သပိတ်‌ စစ်ကြောင်း၊ လောင်းလုံးမြို့နယ်ဒီမိုကရေစီအရေးလှုပ်ရှားမှုသပိတ်ကော်မတီ၊ ထားဝယ်တောင်ပိုင်း သပိတ်စစ်ကြောင်း၊ ရေဖြူမြို့နယ်လူငယ်သပိတ်စစ်‌ကြောင်း၊ ကံပေါက်ဒေသ သပိတ်စစ်ကြောင်း၊ အရှေ့တော သပိတ်စစ်ကြောင်း၊ သရက်ချောင်းမြို့နယ်ဒီမိုကရေစီအရေးလှုပ်ရှားမှု သပိတ် ကော်မတီ၊ နှင်းဆီရောင်အမျိုးသမီးများသမဂ္ဂ(ထားဝယ်)နှင့်အခြေခံပညာ ကျောင်းသားများ သပိတ် ကော်မတီ (လောင်းလုံးမြို့နယ်)တို့ ပါဝင်သည်။

DDMSC သည်  စစ်အာဏာရှင်ဆန့်ကျင်ရေး သပိတ်မှောက်လှုပ်ရှားမှု၊ “နှင်းဆီရောင်အမျိုးသမီးထု လှုပ်ရှားမှု”၊ကျေးလက်အခြေပြု လူထုစည်းရုံးလှုံ့ဆော်ရေး တော်လှန်ရုပ်ရှင်ပြပွဲ၊ စင်ကာပူနိုင်ငံမှအကြမ်းဖက် စစ်အုပ်စုကို ထောက်ပံ့နေသော လက်နက်နှင့် ငွေကြေးလမ်းကြောင်းများအားပိတ်ဆို့ရေး ကမ္ဘာလုံးဆိုင်ရာ လူထုလှုပ်ရှားမှု၊ စစ်တပ်ထုတ် ကုန်ပစ္စည်း‌တွေနှင့်ဝန်ဆောင်မှု လုပ်ငန်းများကို ဆန့်ကျင်သပိတ်မှောက်ကြရန်လအသိပညာပေးလှုပ်ရှားမှု၊ခေါင်းဆောင်မှု (Leadership)၊ လူ့အခွင့်အရေး(Human Right)၊ ကျား/မ တန်းတူရေး(Gender Equality) စသည် ခေါင်းစဉ်များ ဖြင့် အသိပညာပေးဆွေးနွေးမှု၊စစ်ကောင်စီတပ်၏ လှုပ်ရှားမှုများနှင့် ပတ်သက်ပြီး ပြည်သူများအားသတိပေးတိုက်တွန်းခြင်းများ၊ နေရပ်စွန့်ခွာ ထွက်ပြေးတိမ်းရှောင်နေရသူ စစ်ရှောင် ပြည်သူ‌များကိုအခြေခံစားသောက်ကုန်များ ထောက်ပံ့ကူညီမှုများ၊ စစ်အာဏာရှင် ဆန့်ကျင်သည့် Campaignများ၊ မိုးရာသီသစ်ပင်စိုက်ခြင်းလှုပ်ရှားမှု၊ လူထုစည်းရုံးရေးလုပ်ငန်း ဆောင်ရွက်ခြင်း နှင့် အခြားသော စစ်အာဏာရှင်ဆန့်ကျင်ရေး လှုပ်ရှားမှုများကို စဉ်ဆက်မပြတ် ဦးဆောင်လှုပ်ရှား လျက်ရှိသည်။