ဗမာပြည်သူ့လွတ်မြောက်ရေး တပ်တော် (Bamar People’s Liberation Army - BPLA) ကို ၂၀၂၁ ခုနှစ်၊ ဧပြီလ ၁၇ ရက်နေ့ (မြန်မာ့နှစ်ဆန်း ၁ ရက်နေ့) တွင် စတင်ဖွဲ့စည်းနိုင်ခဲ့သည်။ ရက္ခိုင့်တပ်တော် AA ၏ အကူအညီဖြင့် ရှမ်းပြည်နယ်မြောက်ပိုင်းတွင် အခြေစိုက်၍ စစ်ပညာအား သင်ယူခဲ့သည်။ BPLA ၏ နိုင်ငံရေးရည်မှန်းချက်များမှာ -

၁။ အာဏာရှင်စနစ်ကျဆုံးပြီး ပြည်သူလူထုအားလုံး အဖိနှိပ်ခံဘဝမှလွတ်မြောက်ရေး

၂။ လူမျိုးကြီးဝါဒချုပ်ငြိမ်းပြီး တန်းတူညီမျှမှုနှင့် ကိုယ်ပိုင်ပြဌာန်းခွင့်ရရှိရေး

၃။ ဒီမိုကရေစီနှင့် လူ့ရပိုင်ခွင့်ကို အာမခံသည့် ဖက်ဒရယ်ပြည်ထောင်စုနိုင်ငံတော်သစ် တည်ဆောက်ရေး

၄။ ဖက်ဒရယ်ပြည်ထောင်စုသစ်တည်ဆောက်ရာတွင် ပြည်ထောင်စုအဖွဲ့၀င် ဗမာဖက်ဒရယ်ယူနစ် (ဝါ) ဗမာပြည်/ဗမာပြည်နယ် သတ်မှတ်ပါဝင်တည်ဆောက်ရေးနှင့်

၅။ ပြည်သူလူထုတို့၏ လွတ်လပ်မှုနှင့်လုံခြုံမှုကို ကာကွယ်စောင့်ရှောက်ရေး တို့ဖြစ်ပါသည်

BPLA သည် အမှတ် ၁၀၇ နှင့် ၂၀၃ ဟူသည့်  စစ်ဒေသ နှစ်ခုကို တည်ဆောက်ထားသည်။ စစ်ဒေသ အမှတ် ၁၀၇ သည် ကရင်အမျိုးသားလွတ်မြောက်ရေးတပ်မတော် (KNLA) ၊ တပ်မဟာ (၅) ၏ နယ်မြေတွင်း ဖြစ်ပြီး စစ်ဒေသ အမှတ် ၂၀၃ သည် ရှမ်းပြည်နယ်မြောက်ပိုင်းတွင် ဖြစ်သည်။

BPLA သည် အမျိုးသား ညီညွတ်ရေး အစိုးရ (NUG) ကို နွေဦးတော်လှန်ရေး၏ တော်လှန်ရေး အစိုးရ တစ်ရပ်အနေဖြင့် ရှုမြင်သည်။ ရက္ခိုင့်တပ်တော် (AA) သည် အခြေခံ စစ်သင်တန်း၊ စနိုက်ပါအပါအဝင် အဆင့်မြင့် သင်တန်းများပေးခြင်းဖြင့် BPLA နှင့် ပူးပေါင်းနေခြင်းများ ရှိသလို၊ NUG ၏ ကာကွယ်ရေး ဝန်ကြီးဌာန (MOD) နှင့် ပူးပေါင်းကာ တော်လှန်ရေးတွင် ပါဝင်လျက်ရှိသည်။

BPLA သည် တောင်ပိုင်းစစ်ဒေသတွင် ကရင်အမျိုးသားလွတ်မြောက်ရေးတပ်မတော် KNLA၊ ပြည်သူ့ကာကွယ်ရေးတပ်မတော် PDF၊ Force for Federal Democracy - FFD နှင့် တခြား တောင်ပိုင်းဒေသတွင်ရှိသည့် တော်လှန်ရေးအစုအဖွဲ့ အသီးသီးနှင့် ပူးတွဲတိုက်နေပြီး၊ မြောက်ပိုင်းစစ်ဒေသတွင် ညီနောင်မဟာမိတ်သုံးဖွဲ့နှင့် အဓိက စစ်ရေးလှုပ်ရှားနေသည်။

BPLA သည် ၂၀၂၁ ခုနှစ်၊ ဒီဇင်ဘာလတွင် ရှေ့တန်း စစ်မြေပြင်သို့ ရောက်ရှိခဲ့ပြီး ကရင်အမျိုးသား လွတ်မြောက်ရေး တပ်မတော် (KNLA) ၏ အမိန့်ပေး ကွပ်ကဲမှုအောက်တွင် အခြားသော မဟာမိတ် တပ်ဖွဲ့များနှင့် အတူး ပူးပေါင်း တိုက်ပွဲ ဝင်နိုင်ခဲ့သည်။ ထိုကာလမှ စတင်ပြီး ၂၀၂၃ ခုနှစ်၊ ဇွန်လအထိ တိုက်ပွဲ ကာလ တစ်နှစ်ခွဲအတွင်း စစ်ရေး ရလဒ် အနှစ်ချုပ်ကို ၂၀၂၃ ခုနှစ်၊ ဇွန်လ ၃၀ ရက်နေ့တွင် ထုတ်ပြန်ခဲ့သည်။